Imewekwa: Monday 04, December 2023

TANZANIA YANG’ARA KATIKA TUZO ZA KIMATAIFA ZA UTALII (WORLD TRAVEL AWARDS – 2023)

Tanzania imeng'ara katika tuzo za kimataifa za Utalii zilizotolewa na World Travel Awards (WTA) wakati wa sherehe za kutimiza miaka 30 ya tuzo hizo zilizofanyika katika mji wa Dubai, Umoja wa Falme za Kiarabu, Disemba 2, 2023

Katika tuzo hizo, Kisiwa cha Thanda kilichopo katika eneo tengefu la Shungimbili, Wilayani Mafia, Mkoani Pwani kilitangazwa kuwa kisiwa bora cha kipekee duniani (World Leading Exclusive Private Island).

Kisiwa hicho kinachosimamiwa na Taasisi ya Hifadhi za Bahari na Maeneo Tengefu (MPRU) chini ya Wizara ya Mifugo na Uvuvi, ambacho ndani yake kuna hoteli yenye hadhi ya nyota tano kimeshinda tuzo hiyo kwa mara ya Saba mfululizo.

Halikadhalika, Kisiwa hicho pia kilitangazwa kuwa Kisiwa Bora cha Kipekee barani Afrika kwa mwaka 2023.

Mbali na tuzo hiyo ya Thanda Island, Tanzania ilipata tuzo ya nchi inayoongoza duniani katika utalii wa mbugani (World Leading Safari Destination) kwa mwaka 2023 ambayo ilipokelewa na Waziri wa Mifugo na Uvuvi, Mhe. Abdallah Uleg kwa niaba ya Waziri wa Maliasili na Utalii.

Tuzo hizo zilitolewa kando ya Mkutano wa Umoja wa Mataifa wa Mabadiliko ya Tabia Nchi (COP 28) unaoendelea katika mji wa Dubai, Umoja wa Falme za Kiarabu ambapo Mhe. Ulega anahudhuria.